- 395 -

1403. Febr. 14. Liegnitz.

Der Stadtrichter und die Schöppen bestätigen eine Zinsverschreibung für Peter Hezeler.

Ich Nicclos von der Heyde richter czu Legnicz von der stat wegin, vnd wir schepphen doselbist Petir Hezeler, Pawil Brockotindorff, Pawil Czigilstricher, Mathis Tammendorff, Nicclos Elle, Pawil Tesschener vnd Hannus Gysilher bekennen, daz vor vns in gehegtim dinge Mathis Hoberg von syner wegin vnd in vormundeschafft von Elizabethen syner elichen howsfrawen wegin, vnd Nicclos Rader, von syner wegin vnd in vormundeschafft von Margarethen syner elichen howsfrawen wegin, vnd Sigmund Wysewernher bekanten, daz sy vorkaufft hetten Petern Hezeler, dem vorgenanten, dy wile her lebit, czuthun vnd czulassin vnd noch syme tode synen geerbin vnd rechtin nochkomelingen sechs mark vnd czwenczig grosschin erblichs vnd ewigis czinsis vff den hewsern vnd garten vnd vff allir czugehorunge vorm haynowisschin thore, obinwendig vnd nedenwendig, Petir Vngerotens Vorwerke, vnd in der Rosengassen gelegin, vnd gaben en dy vff mit allim rechten vnd in allir mase, alz sy sie habin gehabit. Des waren do keginwortig die hernochgeschrebenn lewthe vnd bekanten, daz di czinse stunden vff iren garten in allir mase, alz hernoch steet geschreben vnd globten en di czu gebin alle jar vff sante Mertins tag vnd ab sy sy en nicht gebin, daz man en pffande dovor sul helffen, domete sy thun mogen alz alle recht mite begangen weren, daz sy sich doran dirholen. Czum ersten Nicclos Melczer eyn schog vir grosschin, Andres Thomas sechczehen scot, Petir Heger vnd Nicclos syn brudir eyne halbe mark, Crowspepetir eyne halbe mark, Hannus Monstarberg dry firdunge dry grosschin, Hannus Hecker eyn schok vnd eyn grosschin, Pawil Bader sechs grosschin, Nicclos Exchen eyn halb schok grosschin, Hannus Bretsnyder virczehen scot. Des czu bekentnisse habin wir desin brif gegebin; dorobir vorsigilt mit vnsern ingesigele. Das ist gescheen in dem dinge an der mittewochen an sante Valentini tage, noch gotis geburt towsund virhundirt jar in dem dritten jare.

O. d. St. L. No. 203, mit beiden Siegeln an Pergamentstreifen.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866